(1903) El camín del mediu...

link

"Naide toque nos extremos
porque siempre son viciayos"

Tar un podre de ricu
jamás fo deyures comenencia,
como non ye tampoco petecible
non tener una perra.
Aquel que todo i sobra, faltai todo,
faltai tranquilidá, non asosiega
cuidando que si sube, que si abaxa,
la propedá, la renta;
ó si-i anden na ronda los lladrones
que güelen la cevera.
Tar mui probe, mui probe,
vivir casi que siempre na miseria,
ye lo mesmu que tar nel Pulgatoriu
pulgando, sin parar, la pena negra.
Ser bon mozu, ser guapu por enteru,
val pa gastar fachenda.
¡ pa mui poco más, asi me salve,
que de provechu sega.
Y el fegu ¿qué ye d'el? Espantapáxaros
de que fuxe la xente á toda priesa.
Del que ye persabiondu, diz que dicen
que tá de la cabeza;
i que ye una trechoria, sí ye burru
que non sabe la O nin otra lletra.
Non debe ser casáu de bon caráuter,
si ye fea la fema,
com' algunes muyeres, les probines,
de focicu espurríu, de faba prieta;
mas si ye la muyer com' una rosa,
guapina com' un sol, y munchu tienra,
entós... probe de 'l probe que la llinde,
ya tien bona faena...
¡Llindara yo miyor milenta cabres
q'andar al rabo d'ella!
Asina pasa siempre n'esta vida
co lo bono y lo malo que se extrema.
¡Non hay que facer más q'andar derechos,
que nel camín del mediu tá la cierta!
Non convien ser muy ricu, nin mui probe,
nin ser pozu de cencia,
nin pollín con albarda, ni un Narcisu,
nin un Piciu moldiau en carbón piedra.
Abonda con quedar nun mediu xustu,
pos ye el camín del mediu la caleya
per ú va la vertú pa toes partes
fuxendo de la quema,
qu' encarnen les maldades de los homes
nel fornu condenau de la blasfemia...
Y abasta: si dalgunu
quier saber algo más, que lo deprienda.
Soy un probe payotu que nel mundo
supo más que llabrar y segar herba,
i que s'esplica 'l probe como sabe
na fala de so tierra,
porque la quier de veres, como madre
que ye la probitina, i ta mui vieya.
Quedábam' una cosa escaecida
que ta bien por enteru que se sepia,
i ye (así Dios me salve de mal güeyu
i de mala cosecha)
que como en casi todes, mesmamente,
tien exceución la regla...
¿Que cuála ye? ¡Recongrio? tais fartucus
de saber cuala ye. Ye la llamuerga
que trayen nel focicu los pulíticos
que caciplen n'Iberia,
i que tienen la patria axeladina,
i fecha n'un boroyu la banmdera...

¿Ta non diestis n'el quiz? ¡La cara dura...,
sin una faraguya de vergüenza!